生仔要考牌（下）
上集：https://bit.ly/3hR5XNs
見到老婆咁慘，我都好心痛。
其實我點解唔想生仔？因為我唔鍾意小朋友，我驚生咗出嚟，我都唔鍾意自己嘅仔女，會唔夠用心照顧佢，會傷害到佢。
但為咗我嘅個人喜惡，令老婆一世痛苦，我……於心不忍。
「老婆，你畀多一年時間我，明年我一定會考到牌，我哋名正言順咁生仔。」我許下承諾，呢次，係真心嘅。
考牌嘅過程唔係好難，我之前已經俾老婆逼住，讀咗三年嘅《父親育兒寶典》，幾乎倒背如流。
考牌時得到嘅分數愈高，第日仔女揀幼稚園都有一定優待。
為咗令老婆開心，為咗我哋嘅仔女有更美好嘅人生，我直情讀埋老婆嘅《母親育兒寶典》，一心考個滿分。
事情非常順利，我嘅分數好高，馬上拎到育兒牌照。
老婆好快就有咗，我應承佢，我一定會用盡我學番嘅育兒知識，好好照顧我哋個仔。
至於老婆自己，更加唔駛講啦，佢咁努力考試、咁落力逼我，千辛萬苦都係為咗生個仔，佢一定會好錫個仔。
我堅信，我個仔一出世，就會擁有最好嘅阿媽，同努力做到最好嘅阿爸。
喺萬眾期待中，我個仔呱呱落地，老婆流出感動嘅眼淚。
坦白講，我都係唔鍾意小朋友，但既然生咗出嚟，就有責任好好照顧。
我照住《育兒寶典》，細心照料仔仔。
但過咗三個月後，我開始覺得有啲唔妥……老婆有啲唔妥。
老婆好似冇乜心機照顧仔仔咁，咩都係叫我嚟做。
佢只有一個時候會主動抱起仔仔，就係影相打卡嘅時候。
有一次，老婆影完相，就即刻叫我抱番仔仔。
我終於忍唔住問：「你唔鍾意仔仔咩？」
「點會呢？」老婆打開IG，全部都係仔仔嘅相：「個個都話我係一個好媽媽。」
我接二連三咁問：「咁事實上呢？《母親育兒寶典》嘅內容，你做到咗幾多？或者我問，你同仔仔換過幾多次片？」
老婆望吓仔仔，望吓我，眼神由想反駁，變成迷茫，再變成傷感。
「仔仔出世之後，我發現，我冇想像中咁想照顧佢。」老婆諗一諗：「又唔係唔鍾意，但見到你咁努力照顧佢，我就寧願偷吓懶……」
「一開始，係你想生仔㗎喎，你話你好鍾意小朋友。」我難以置信。
老婆反駁：「咁你夠話，你唔鍾意小朋友啦，你依加咪好錫佢、好努力照顧佢。」
強辭奪理……不過同老婆講道理，由開口嗰一刻已經注定敗亡嘅命運。
我終於明白，其實老婆都唔知道，自己真正想要嘅係乜。
只係佢啲朋友都生咗仔，爭相炫耀，令佢覺得自己都應該、必須生個仔。
當佢個腦出現「想要一樣嘢」嘅念頭，佢就全心全意為嗰樣嘢而努力，甚至唔再思考，自己係咪真係咁想要嗰樣嘢。
不過，仔都生咗，又冇得塞番佢入去，我唯有繼續照顧佢，做個好老豆啦。
所以話呢，女人嘅嘢，真係好狡猾。
有時佢哋話想要，其實係唔想要；
有時佢哋話想要，其實係依加想要，但之後會唔想要；
有時佢哋話想要，其實佢哋心底係唔想要，只係佢哋仲未知道；
有時佢哋話想要，又可能真係想要喎。
真係唔怪得咁多男人會脫髮。
—完—
將專頁設定為「搶先看」/ "See first"，最新故仔馬上睇！
新書《筍工重生高科技》已經出版了，現正發售中，
詳情可點擊這裡：https://bit.ly/32hgoSN
你的支持是我最大的動力！
#短故 #短篇 #小說 #陳美濤 #廣東話 #粵語 #tomatochan #生仔要考牌
Search